Ek Yateema Aesi Bhi Thi - Ayyam e Fatmiyah Noha 2024 - Syed Raza Abbas Zaidi

راہ  میں  ناقے  سے جب  گرگئی  چھوٹی  زہراؑ
گود   میں   ایک  ضعیفہ   نے  اُسے   تھام   لیا
سر پہ جب  ہاتھ  رکھا  روکے  سکینہؑ   نے  کہا
جب سے بابا سے میں بچھڑی ہوں بہت ماراگیا
میرے گالوں پہ طمانچوں کے نشاں ہیں بی بی
تم  نے  دیکھی  ہے مرے  جیسی  یتیمہ  کوئی

بات جب یہ سنی  وہ   بھی  رونے  لگی
پھر  ضعیفہ  سکینہؑ   سے   کہنے    لگی

تم سے پہلے اک یتیمہ ایسی بھی تھی

ہاں تمہارے وطن میں ہی رہتی تھی وہ
بادشاہِ   مدینہ   کی   بیٹی    تھی    وہ
باپ   کے   بعد     اتنے     مصائب    پڑے
اپنے گھر میں سہارے سے چلتی تھی وہ
غم   اُٹھاتی   رہی   خم    کمر    ہوگئی
نوجوانی  میں  ہی  جو  ضعیفہ   ہوئی

ظالموں نے یوں  بابا کا  پرسہ  دیا
جلتا   دروازہ   اُس  پر  گرایا  گیا
در  کے نیچے تھی وہ در ہٹا نا سکی
ہاتھ بھی جل گئے پہلو زخمی ہوا
لوگ چل کر یہاں سے گئے جب وہاں
پاؤں  رکھ رکھ کے توڑی گئی پسلیاں

گال   نیلے   ہیں    جیسے    تمہارے  ابھی
اُسکے گالوں کی رنگت بھی ایسی ہی تھی
سامنے   اُسکو   بیٹوں    کے     مارا      گیا
وقت  یہ   نا   کسی   ماں  پہ   آئے   کبھی
شاہ زادی  سنو   کتنی   بے   بس  تھی  وہ
گھر میں بچوں سے چہرا چھپاتی تھی جو

جسطرح  تیرے  کانوں  سے ہے خوں رواں
کان اُسکے بھی زخمی تھے اے  میری جاں
اتنی   شدت    سے   ظالم   نے   مارا  اُسے
ٹوٹ  کر   خاک    پہ   گر    گئیں     بالیاں
بیٹی  بن  باپ  کی  درد   سہہ   نا   سکی
ہاتھ   کانوں  پہ  رکھ  کر  وہ  روتی  رہی

پانی اُٹھ اُٹھ کے  جسکو پلاتی تھی وہ
لوریا ں دے کے  جسکو سلاتی تھی وہ
ہاتھ  چادر میں  اُس  سے چھپانے لگی
ہاتھ پھیلاکے جسکو بلاتی   تھی    وہ  
کیسےکہتی وہ ماں میرےدل میری جاں
 تازیانوں سے زخمی  ہیں  سب اُنگلیاں

اُسکا  مرنا  بھی  سب  سے چھپایا گیا
چودہ  لوگوں میں گھر سے جنازہ اُٹھا
اُسکی  چالیس   قبریں   بنائی    گئیں
بس  یہ  سنتے ہی  بچی  نے  روکر کہا
اے ضعیفہ سنو میری  دادی تھیں وہ
مجھکو  جلدی  بتاؤ  کہ  تم  کون ہو

ہاتھ   پہلو   سے   اپنے   اُٹھاتے  ہوئے
زخمی  چہرے  سے  پردہ  ہٹاتے ہوئے
اے  رضا  اور   ذیشان    رونے   لگیں
یہ    سکینہؑ   کو   زہراؑ   بتاتے    ہوئے
میرا  ورثہ  ہو تم  میرا  چہرا  ہو تم

اب سمجھ آیا کیوں چھوٹی زہرا ہو تم